Notisia

Konferensia na UNESCO PARIS

Geplaatst op 15 Novèmber 2019 dor di Ministerio di Enseñansa, Siensia, Kultura & Deporte

Willemstad - Paris. Manera ya ta konosí pais Kòrsou a bira miembro asosiá di UNESCO na 2011, kaminda paisnan ta traha huntu pa logra metanan pa benefisiá nan komunidatnan.

Gobièrnu di Kòrsou ta representá pa Minister di Enseñansa, Siensia, Kultura & Deporte (ESKD) sra. Marilyn Alcalá-Wallé na e di 40 konferensia General di UNESCO na Fransia, Paris. E konferensia aki ta kaminda paisnan di rònt mundu ta bini huntu pa deliberá riba e programa i presupuesto di e organisashon internashonal UNESCO pa e próksimo dos añanan. Alabes nan ta disidí riba e futuro di algun di e temanan di mas importante aktual manera enseñansa/edukashon, 'gender equality', idioma, komunikashon i informashon, desaroyo duradero, kultura i hopi mas. Mas di 190 minister a kombertí e sede prinsipal di UNESCO na Paris den un laboratorio di ideanan i kaminda ta mira multi-kulturismo den akshon pa desaroyo global.

Minister ta wòrdu asistí dor di Sekretario-General di UNESCO Kòrsou sra. Marva Browne, Direktor di Maneho di ESKD sra. Susan Larmonie-van Heydoorn i sra. Herta Parabirsing.

Un total di 193 paisnan miembro i miembro asosiá ta partisipá na e konferensia ku ta un di e plataformanan global di mas importante den mundu. Mas aleu paisnan tur ta haña oportunidat pa durante 6 minüt kompartí ku UNESCO e logronan i tambe preokupashonnan ku nan tin i kon nan ta kere UNESCO por yuda den aliviá esakinan pa medio di su programanan riba tereno di enseñansa, siensia, kultura, komunikashon i informashon.

Minister Marilyn Alcalá-Wallé a hiba palabra na e okashon aki kaminda el a pone énfasis riba entre otro e importansia di e Tratado nobo pa rekonosé diploma i gradonan den e region Latino Amerika i Karibe, e firmamentu di e deklarashon di Antigua i Barbuda riba Seguridat na Skol den Karibe, kambio di klima i su impakto pa nos, ko-ratifikashon di e konvenio di herensha supmarino i tambe atenshon pa nos idioma materno Papiamentu ku próksimamente ta un punto pa subi riba e lista di herensia intangibel.

Por lo demas e minister a i ta partisipá den vários reunion ku ta di gran balor pa nos pais ku temanan aktual manera e posishon di mundu pa ku e tema di enseñansa superior/avansá.

Partisipashon na e Konferensia aki ta di gran relevansia pa nos nashon komo ku esaki ta un di e plataformanan di mas importante internashonal pa dialogá, interkambiá i yega na komprondementu mundial riba áreanan di enseñansa, siensia, kultura, komunikashon i informashon den e reunionnan.

Anekso tin e disertashon/ intervenshon di Minister Alcalá-Wallé durante di e seshon di Debate General di Maneho den Headquarter di UNESCO Paris.

Klik aki e Link pa e disertashon: Disertashon di Minister Alcalá-Wallé na Fransia 

*******************************

Ministerio konserní

Bo opinion