Notisia

Di dos reunion Ministerial di Vierlandenoverleg (4LO)

Geplaatst op 13 Novèmber 2019 dor di Ministerio di Enseñansa, Siensia, Kultura & Deporte

WILLEMSTAD - E di dos 'Vierlandenoverleg (4LO)' riba tereno di ENSEÑANSA, SIENSIA i KULTURA a tuma lugá resientemente na Den Haag, Hulanda. Durante di e reunion aki e 4 paisnan Aruba, Kòrsou, Hulanda i Sint Maarten a hiba deliberashonnan, interkambia di konosementu, traha palabrashon konkreto i firma akuerdo riba temanan di interes komun relashoná ku Enseñansa, Siensia i Kultura.

Meta di e enkuentro aki ta pa fortalesé e lasonan entre e paisnan, sostené i fortifiká otro den e diferente trabounan, yega na solushon konhunto pa retonan  ku e paisnan den Reino ta konfrontá, ku e vishon pa sigui mehorá kalidat di enseñansa i brinda mihor oportunidat na e komunidatnan, i intensivá kolaborashon riba tereno di Enseñansa, Kultura i Siensia den Reino Hulandes.

Kada un pais a keda representá dor di un o mas minister huntu ku nan delegashon: Minister di Enseñansa, Siensia, Kultura i Deporte pa Kòrsou, sra. Marilyn Alcalá-Wallé, Minister Plenipotensiario di Kòrsou sr. Anthony Begina, Minister di Enseñansa, Kultura i Siensia di Hulanda, sra. Ingrid van Engelshoven, Minister di Enseñansa, Siensia i Desaroyo Sostenibel di Aruba, sr. Armando (Rudy) Lampe, Minister Plenipontensiario sr. Guillfred Besaril den representashon di Minister di Kultura di Aruba i Minister Plenipontensiario, sra. Jorien Wuite den representashon di Minister di Enseñansa di Sint Maarten.

E reunion a keda organisá pa Ministerio di Enseñansa di Hulanda riba dianan 11-12 novèmber último na Den Haag. E reunion a bai den un ambiente hopi profeshonal kaminda a dialogá i interkambia ku otro den un forma fuerte pero ku rèspèt. Durante e reunion e ministernan a evaluá progreso di e palabrashonnan ku a keda hasí den e promé reunion di 4LO di febrüari 2019. Tambe a trata puntonan ku ta regardá: 'fondo kultural pa e área karibense, herensia kultural intangibel, arkeologia supakuátiko, digitalisahon di biblioteka, finansiamentu di estudio, eksamen, fluho di studiantenan pa estudionan avansá i superior na Hulanda, finansiamentu di estudio, akreditashon NVAO i preparashon pa e di 40 konferensia di UNESCO 2019 na Paris'. Tur e puntonan aki a keda diskutí pa halsa e kalidat di enseñansa i siensia i alabes pa intensivá e kolaborashon den reino hulandes.

Na final di e reunion e ministernan a firma un akuerdo(slotverklaring) i tambe e palabrashonnan ku a keda hasí. Den próksimo periodo i huntu ku tur e partnernan di den enseñansa i kultura ta sigui traha riba palabrashonnan i duna mas informashon riba e akuerdo aki.

Ministerio di Enseñansa, Siensia, Kultura & Deporte ku a keda representá pa Minister sra. Marilyn Alcalá-Wallé, Direktor di Maneho sra. Susan. Larmonie-van Heydoorn i Direktor di Sektor di Enseñansa & Siensia sr. Wladimir Kleinmoedig por mira bèk riba un reunion fruktífero i ku ta stimulá e desaroyo positivo den Reino Hulandes pa un mihó kalidat i kolaborashon entre e 4 paisnan den reino relashoná ku enseñansa i siensia.

**Riba potrèt por mira e enkuentro di “Vierlandenoverleg” na Den Haag, Hulanda.

****************

Ministerio konserní

Bo opinion